Ladina Heimgartner va a Berna

23.02.2011 Ladina Heimgartner, manadra dal ressort "Reflexiun" da RTR Radiotelevisiun Svizra Rumantscha è vegnida tscharnida per il post da manadra da la partiziun "Martgà e Qualitad" en la direcziun generala da la SRG SSR a Berna. Quest post è vegni installà dal nov directur general Roger de Weck. Ladina Heimgartner vegn a far part dal stab dal directur general.

Ladina Heimgartner (31) vegn a manar en sia nova funcziun da cader a Berna in team ch'è responsabel per la controlla da qualitad da l'offerta publicistica da la SRG SSR. Ultra da quai coordinescha ella ils programs naziunalas, administrescha il "Pacte d'audiovisuel" cun la branscha cineastica da la Svizra ed observa tendenzas e trends internaziunals.

Ladina Heimgartner è naschida 1980 e creschida si a Scuol. La scola media ha ella fatg a l'Institut Otalpin Ftan. Da 2000 fin 2006 studegia ella a l'universitad da Fribourg litteratura veglia e moderna tudestga e lingua e litteratura rumantscha. Ils examens da licenziat terminescha ella cun ina lavur sur dal poet medieval Ulrich da Liechtenstein. 

Per in curt temp lavura ella sco schurnalista tar il Bündner Tagblatt ed entra il settember 2007 tar RTR Radiotelevisiun Svizra Rumantscha. Gia in onn pli tar vegn ella tscharnida sco manadra dal ressort "Reflexiun", in ressort che cumpiglia emissiuns da pled. Ladina Heimgartner ha sviluppà divers format, spezialmain l'emissiun per uffants e giuvenils "Minisguard". 

Mariano Tschuor, directur dad RTR: "Cun Ladina Heimgartner perda RTR ina collavuratura excellenta cun autas qualitads professiunalas. Nus gudagnain dentant ina ambassadura ferventa en la direcziun generala a Berna". 

rtr

Ulteriuras infurmaziuns:

Mariano Tschuor

Tel.: 081 255 75 75

E-Mail: mariano.tschuor@rtr.ch

Quelle:

http://www.rtr.ch/home/novitads.html

Zurück zur Übersicht